සිංහල බෞද්ධ සංස්කෘතිය බිහි කළ විශිෂ්ටතම දාර්ශනිකයා, චින්තකයා ලෙස හැදින්වූයේ ආචාර්ය නලින් ද සිල්වා මහතාය. එවැනි සංගත දැනුමක් ඇත්තෙකු යළි  සියවස් ගණනකින්වත් බිහිවෙනු ඇතැයි සිතිය නොහැකි යැයි කිවහැකිය. එහෙත් එතුමාගේ අදහස් නිවැරදි ලෙස ග්‍රහණය කරගත නොහැකි පිරිසට එතුමා මිත්‍යා මත දරන්නෙක් හා ජාතිවාදියෙක් ලෙස ද පෙනුණි.

1944 ඔක්තෝම්බර් 20 දින පානදුර, කෝවිලගොඩැල්ලහි උපන් නලින් ද සිල්වා මහතා පානදුර, වෑකඩ  බෞද්ධාලෝක මහා විද්‍යාලයෙන් ප්‍රාථමික අධ්‍යාපනය ලබා ද්වීතියික අධ්‍යාපනය කොළඹ තර්ස්ටන් විද්‍යාලයෙන් හා රාජකීය විද්‍යාලයෙන් ලබාඇත. ඔහු 1970 දී විවාහ වන අතර ඔහුට පුතුන් දෙදෙනෙකු සහ එක් දියණියක සිටී.

1962 දී ලංකා විශ්වවිද්‍යාලයට ඇතුළත්ව 1967 දී ගණිතය අංශයෙන් පළමු පන්තියේ ‍ගෞරව උපාධියක් ලැබූ එතුමා ආචාර්ය උපාධිය සඳහා ගියේ එංගලන්තයේ සසෙක්ස් විශ්වවිද්‍යාලයටය. මහාචාර්ය මැක්රේ මහතා (William McCrea) යටතේ සෛද්ධාන්තික විශ්ව න්‍යාය (Cosmology)  පිළිබඳ ආචාර්ය උපාධි නිබන්ධනය අවුරුදු එක හමාරක් (මාස 18)  වැනි කෙටි කාලයකින් අවසන් කර ආචාර්ය උපාධිය ලබාගත් එකම විද්වතා වන්නේ  නලින් ද සිල්වා මහතා බව ද කියැවේ.

1970 දී ආචාර්ය උපාධිය ලබනවිට එතුමාගේ වයස අවුරුදු 26 කි. එයද ලංකාවේ කිසිවෙකු තවමත් අතික්‍රමණය නොකළ වාර්තාවකි. ආචාර්ය උපාධියෙන් පසු ලංකාවට පැමිණි එතුමා පේරාදෙණි සරසවියේ කථිකාචාර්යවරයකු වශයෙන් වසර 05ක් සේවය කර ඇත. 1979 දී කොළඹ විශ්වවිද්‍යාලයේ ගණිත අංශයේ ආචාර්යවරයකු ලෙස පත්විය. අවසන් කාලයේ  විශ්‍රාම ලැබූයේ කැලණිය විශ්වවිද්‍යාලයේ ද කලක් සේවය කළ මහාචාර්යවරයකු වශයෙනි.

Sussex විශ්වවිද්‍යාලයේ හිටපු කීර්තිමත් ගණිතඥයකු මෙන්ම රාජකීය තාරකා විද්‍යාඥයන්ගේ සංගමයේ සභාපතිවරයකු ද වූ මහාචාර්ය විලියම් මැක්රේ මහතා නලින් ද සිල්වා මහතා ලංකාවට බලා පිටත්ව යද්දී  "ඔබේ රට ඔබ ගැන ආඩම්බර වේවි" (your country will be proud of you) යනුවෙන් ලියා දී ඇති බවට සදහන්ව පවතී. ඒ කෙසේ වුවත් ඉතා අතලොස්සක් හැර අපේ රටේ මිනිසුන් එතුමා ගැන ආඩම්බර වූවාද සැක සහිතය. එතුමාගේ වටිනාකම හදුනාගෙන තිබුණේ ද නැති තරම් ය. විසුරුණු  ජාතික අදහස්වලට න්‍යායක් ගොඩනගා දුන්නේ මහැදුරු නලින් ද සිල්වා මැතිදුන් වුවත් ඒ බව ජාතික චින්තන කදවුරේ අයට ද ඒ පිළිබද නිසි අවබෝධයක් තිබුණාදැයි සැක සහිත ය. බටහිර දැනුම් ආධිපත්‍යයෙන් මනාව මිදුණු  එතුමාට සම කළ හැකි ප්‍රාඥයෙක් මෑත ඉතිහාසයේ බිහිව ඇත්දැයි කිව නොහැකි තරම් ය.

නලින් ද සිල්වා මාක්ස්වාදී ට්‍රොට්ස්කිවාදී ලංකා සම සමාජ පක්ෂයේ සහ නව සම සමාජ පක්ෂයෙහි හිටපු සාමාජිකයෙකි.

1986 දී ඔහු විසින් ‘මගේ ලෝකය‘ කෘතිය තුළින් දර්ශනවාදී අදහස් ඉදිරිපත් කළේය.

එතුමාගේ පුතාගේ සුවදුක් බැලීම සදහා ඇමරිකාව බලා පිටත්ව ගොස් සිටිය දී මෙලෙස හදිසියේ අභාවප්‍රාප්ත වී ඇති බව පවුලේ ඥාතීන් විසින් තහවුරු කර ඇත. අවසන් කටයුතු සිදුකරන ආකාරය පිළිබද ඉදිරියේ දී දැනුම් දීමට කටයුතු කරන බව ද සදහන් වේ.