අපි තවමත් ඉන්නේ ඒදණ්ඩක් උඩ - ජනපති කියයි

Apr 5, 2024 at 04:18 PM

|

Dawasa News

පසුගිය වසර දෙක තුළ රජය ගත් නිවැරදි තීන්දු තීරණ හේතුවෙන් මේ වන විට රටේ ආර්ථිකය ශක්තිමත් වී ඇති බව ඊයේ (04) රත්නපුර, දෙමුවාත ප්‍රදේශයේ ඉදිකළ මැණික් කුළුණ විවෘත කරමින් ජනපති කියයි. 

ජනාධිපතිවරයා වැඩිදුරටත් අදහස් දක්වමින් කියා සිටියේ ආර්ථිකය ශක්තිමත් වී හේතුවෙන් අද ඕනෑම කෙනෙකුට රට තුළ දේශපාලනය කිරීමට අවස්ථාව උදා වී ඇති බවයි. 

2022 වසර හා සැසදීමේ දී 2023 වසරේ දී රජයේ අදායම 50%කින් ඉහළ නැංවී ඇති බවත්, ඒ හේතුවෙන් ජනතාවට ප්‍රතිලාභ රැසක් ලබාදීමට හැකි වූ බවත් පවසා සිටියා. 

එදා ත්‍රිවිල් රථයකට කුලී ගමනක් යාමට ඉන්ධන තිබුණේ නැහැ. විදුලිබලය තිබුනේ නැහැ. අද ඕනතරම් ඉන්ධන තිබෙනවා. දෙස් විදෙස් සංචාරකයන් නිසා ත්‍රිවිල් රථ රියදුරන්ගේ ආදයම වැඩි වී තිබෙනවා. අද ත්‍රිවිල් රථවල පෝස්ටර් ගහගෙන දේශපාලනය කරනවා. නමුත් අප පසුගිය වසර දෙක තුළ මෙම පියවර ගත්තේ නැත්නම් ඔවුන්ට මේ සඳහා අවස්ථාවක් ලැබෙන්නේ නැහැ.අපි මේ ආර්ථිකය ආරක්ෂා කරගෙන ඉදිරියට යා යුතුයි. මින් ඉවත් වුවහොත් අපි නැවත වැටෙනවා. තවමත් අප සිටින්නේ ඒදණ්ඩ මතයි. ඒ නිසා එයින් වැටෙනවද, නැද්ද කියා අප තීරණය කළ යුතු යැයි ද ජනපතිවරයා අදහස් දක්වමින් කියා සිටියා. 

ජනපතිවරයා විසින් විවෘත කළ ජාත්‍යන්තර මැණික් හා ස්වර්ණාභරණ වෙළඳ මධ්‍යස්ථානය ව්‍යාපාරික ස්ථාන 27කින් සමන්විත වන අතර එයින් දේශීය ව්‍යාපාරිකයන්ට ව්‍යාපාරික ස්ථාන 17ක්ද, විදේශීය ව්‍යාපාරිකයන් සඳහා ව්‍යාපාරික ස්ථාන 10ක්ද ලබාදීමට නියමිත බව වාර්තා වෙනවා.