තලතා සජිත් හැරයයි

Aug 21, 2024 at 11:49 PM

|

Dawasa News

සමගි ජන බලවේගයේ රත්නපුර දිස්ත්‍රික් පාර්ලිමේන්තු මන්ත්‍රිනි තලතා අතුකෝරල මහත්මිය අද (21) පාර්ලිමේන්තුවේ දී විශේෂ ප්‍රකාශයක් සිදු කරමින් සිය මන්ත්‍රීධුරයෙන් ඉල්ලා අස්වන බව ප්‍රකාශ කර සිටියා ය.

එම අවස්ථාවේ දී ඇය සමගි ජන බලවේගයේ නායක්වය දැඩි ලෙස විවේචනය කරමින් සිය විශේෂ ප්‍රකාශය සිදුකළ අතර සමගි ජනබලවේගය අද වන විට හොරුන්ට, දූෂිතයන්ට නතු වූ පක්ෂයක් බව ද අවධාරණය කර සිටියා.

ඇය වැඩිදුරටත් කියා සිටියේ අපේ හිටපු නායකයාත්, නියෝජ්‍ය නායකයාත් දෙපිළකට බෙදිලා ජනාධිපතිවරණයට තරග කරනවා. අනෙක් හැමෝම එකතුවෙන මොහොතක අපේ කදවුර දෙපැත්තකට බෙදිලා මගේ හෘදසාක්ෂියට අනුව මට එයට එකග වෙන්න බෑ. ඒක අපරිණත දේශපාලන තීන්දුවක් ලෙස මම දකිනවා.

මට වෙලාවකට හිතෙනවා සජිත් ප්‍රේමදාස මහතාට ඉක්මණින් ජනාධිපති වීමේ හදිසියක් ඇති බවයි. කෘතිම රැල්ලක් සාදාගෙන බලය ගන්න දගලනවා. කාලයක් නයි මුගටි වගේ සිටි පිරිස් ගොඩයන්න සමගි ජන බලවේගයට එකතු යනුවෙන් ද ප්‍රකාශ කර සිටියා ය.

තලතා අතුකෝරල, එක්සත් ජාතික පක්ෂයේ නියෝජ්‍ය නායකයෙක් වූ දිවංගත ගාමිණී අතුකෝරල මහතාගේ සහෝදරිය වෙයි.

ඇය 2004 වසරේදී පළමුවෙන් පාර්ලිමේන්තුවට තේරී පත්වූවාය. එසේම 2010, 2015 සහ 2020 මහ මැතිවරණවලදී ඇය රත්නපුර දිස්ත්‍රික්කයෙන් නියෝජනය කරමින් පාර්ලිමේන්තුවට තේරී පත්වූවාය