පාඨලී, ඩිල්ෂාන්, බදියුදීන් සජිත්ට එක්වෙයි

Aug 14, 2024 at 10:14 PM

|

Dawasa News

ඉදිරි ජනාධිපතිවරණ වෙනුවෙන් හිටපු අමාත්‍ය පාඨලී චම්පික රණවක මහතාගේ නායකත්වයෙන් යුත් එක්සත් ජනරජ පෙරමුණ අද (14) සමගි ජන සන්ධානය සමඟ සන්ධාන ගත වුණා.

සමගි ජන බලවේගයේ නායක සජිත් ප්‍රේමදාස සහ පාඨලි චම්පික රණවක අතර මෙම ගිවිසුමට අත්සන් තැබුණු අතර පාඨලී චම්පික මන්ත්‍රීවරයා 2020 මහ මැතිවරණයේ දී පාර්ලිමේන්තුවට තේරීපත් වූයේ ද සමගි ජන බලවේගය නියෝජනය කරමිනි.

මේ අතර හිටපු ක්‍රිකට් නායක තිලකරත්න ඩිල්ෂාන් සහ ඔහුගේ බිරිය රංගන ශිල්පිණී මංජුලා තිලිණි මහත්මිය ද සජිත් ප්‍රේමදාසට මහතාට සහාය පළකරමින් අද (14) සමගි ජන බලවේගයේ සාමාජිකත්වය ලබාගත්තා.

එකල රාජපක්ෂ පවුල සමග කටයුතු කළ ඩිල්ෂාන් පොහොට්ටුවේ පළමු සාමාජිකයින් අතර සිටි ප්‍රමුඛ පෙළේ අයෙකි. පසුකාලයේ ඔහු දේශපාලනයෙන් ඉවත් වී ඕස්ට්‍රේලියාවේ පදිංචියට ගොස් සිටියා.

පාර්ලිමේන්තු මන්ත්‍රී රාජිත සේනාරත්න මහතාගෙන් පුරප්පාඩු වූ සමගි ජන බලවේගයේ කළුතර දිස්ත්‍රික්, බේරුවල සංවිධායක ධූරයට ඩිල්ෂාන් මහතා පත් කර අදාළ පත්වීම් ලිපිය ද ලබා දී ඇති බව වාර්තා වේ.

එසේම ඉදිරි ජනාධිපතිවරණයේ දී පාර්ලිමේන්තු මන්ත්‍රී රිෂාඩ් බදියුදීන් මහතා ප්‍රමුඛ සමස්ත ලංකා මහජන කොංග්‍රසය ද සජිත් ප්‍රේමදාස මහතාට සහාය පළ කිරීමට අද (14) තීරණය කර ඇති බව වාර්තා වේ.