තවත් මහා පිරමීඩ ජාවාරමක්

Jul 23, 2024 at 09:54 PM

|

Dawasa News

පසුගිය කාලයේ විවිධ නම් වලින් ක්‍රියාත්මක වෙමින් මුදල් සූරා කෑ පිරමීඩ ජාවාරම් ක්‍රම ගණනාවක් පිළිබද අපට අසන්නට ලැබුණා. ඒ සියල්ලම පාහේ නීතියේ රැහැනට අසු වී ඇති පසුබිමක තවත් පිරමීඩ ජාවාරමක් පිළිබද අනාවරණය වී තිබෙනවා.

මේ හරහා රුපියල් කෝටි 350ක මුදලක් වංචා කර ඇති බවත්, කාන්තාවක් ඇතුළු තිදෙනෙකු අපරාධ පරීක්ෂණ දෙපාර්තමේන්තුව මගින් මේ වන විට අත්අඩංගුවට ගෙන ඇති බවත් දවස පුවත් වෙත වාර්තා වෙනවා.  

ඔවුන් එම පිරමිඩ මුදල් වංචාව සිදුකර ඇත්තේ R3Fයන යෙදුම භාවිතා කරමින් බව ද වැඩිදුරටත් සදහන් වෙනවා.

Ride To Three Freedom Sri Lanka නොහොත් R3F යන යෙදුම මගින් ඩිජිටල් මුදල් භාවිතය හරහා සිදුකරන පිරමීඩ ජාවාරමකින් විශාල වශයෙන් මුල්‍ය වංචාවක් සිදුකෙරෙන බව අපරාධ පරීක්ෂණ දෙපාර්තමේන්තුවේ මූල්‍ය අපරාධ විමර්ශන ඒකකයට පසුගිය දිනවල පැමිණිලි රැසක් ලැබී තිබෙනවා.

විමර්ශන වලට අනුව පුද්ගලයන් 5500ක් පමණ මෙම ජාවාරමට මේ දක්වා හසුව ඇති බව ද සදහන් වෙනවා.

මේ හරහා ගිණුම් 31,000ක් පමණ සකස් කර ඇති අතර පාරිභෝගිකයන්ට ජාවාරම්කරුවන් පවසා ඇත්තේ, ආයෝජනය කරන මුදල මෙන්  සිව්ගුණයක් මාස 10කදී උපයාගත හැකි අතර දෛනිකව 1%ක ලාභාංශයක් ලබාගත හැකි බවත් ය.

මෙම ජාවාරම මගින් තමන් රුපියල් කෝටි 350ක පමණ මුදලක් වංචා කළ බව අත්අඩංගුවට පත් සැකකරුවන් අනාවරණය කර ඇති බව ද වාර්තා වෙනවා.

මෙම මුදලින් රුපියල් කෝටි 50ක් පමණ මුදලක් මුල් කාලයේදී ලාභ ලෙස සාමාජිකයන්ට ලබාදුන් බවත්, තවත් මුදල් මුදල් ප්‍රමාණයක් මෙවැනිම පිරමීට ක්‍රම වල ආයෝජනය කර ඇති බව ද සැකකරුවන් පවසා තිබෙනවා.  

මෙවැනි ක්ෂණික ලාභ ලබාදෙන ක්‍රම පිළිබද වඩා විමසිලිමත් වන ලෙස රජය වැඩිදුරටත් ඉල්ලා සිටිනවා.