පැරිස් ඔලිම්පික් ක්‍රීඩා සැණකෙළිය හෙටින් (26) ඇරඹේ

Jul 25, 2024 at 11:05 PM

|

Dawasa News

සෑම සිව් වසරකටම වරක් පැවැත්වෙන ඔලිම්පික් ක්‍රීඩා සැණකෙළිය මෙවර ප්‍රංශයේ පැරිස් නුවර කේන්ද්‍ර කරගනිමින් පැවැත්වීමට නියමිතය.

ඒ අනුව හෙට (26) වැනිදා පැවැත්වීමට නියමිත සමාරම්භක උළෙලින් ඇරඹෙන ක්‍රීඩා සැණකෙළිය දින 16 ක් තිස්සේ පැවැත්වෙන අතර අගෝස්තු 11 වැනිදා පැවැත්වෙන සමාප්ති උළෙලින් අවසාන වීමට නියමිතය.

1924 දී පැරිස් නගරය ඔලිම්පික් ක්‍රීඩා උළෙල සදහා සත්කාරකත්වය දැරීමෙන් හරියටම වසර සියයකට පසුව නැවතත් 2024 දී මෙවර ඔලිම්පික් ක්‍රීඩා සැණකෙළිය සදහා සත්කාරකත්වය දැක්වීමට ප්‍රංශයට ඓතිහාසික අවස්ථාවක් ලෙස දැක්විය හැකිය.

එසේම මෙවර ද සමග ප්‍රංශය හය වතාවක් ඔලිම්පික් ක්‍රීඩා උළෙල සදහා සත්කාරකත්වය දක්වා ඇති අතර ඔලිම්පික් උළෙල තුනක් පවත්වා ඇති දෙවන නගරය බවට ද පැරීසිය පත්වෙයි.

ඔලිම්පික් ක්‍රීඩා උළෙල සදහා වැඩිම වාරගණනක් සත්කාරකත්වය දරා ඇත්තේ ඇමරිකාව වන අතර එය අවස්ථා 8ක් ලෙස සටහන් වේ. එසේම වැඩිම වාර ගණනක් සත්කාරකත්වය දරා ඇති නගරය ලෙස දැක්වෙන්නේ එංගලන්තයේ ලන්ඩන් නගරයයි. ඒ අවස්ථා තුනකදී සත්කාරකත්වය දැරීමෙනි.

කෙසේ වුවද මෙවර ලෝකයේ පවතින විවිධ යුද ගැටුම් හා විවිධ ත්‍රස්ත ක්‍රියාකාරකම් හේතුවෙන් පැරිස් නුවරට විශේෂ ආරක්ෂාවක් සපයා ඇතැයි ද විදෙස් මාධ්‍ය වාර්තා කරයි.