ඇමරිකා එක්සත් ජනපදයේ බැල්ටිමෝර් වරාය ආසන්නයේ පිහිටි පැටැස්කෝ ගංගාව හරහා ඉදි කර තිබූ ෆ්‍රැන්සිස් ස්කොට් කී පාලමේ කුළුණක ගැටුණු දැවැන්ත බහාලුම් ප්‍රවාහන නෞකාවක් හේතුවෙන් එම පාලම කඩා වැටුණු බව විදෙස් මාධ්‍ය වාර්තා පවසයි.

අනතුර සිදුවන අවස්ථාවේ දී පාලම මතින් මෝටර් රථ හතක් පමණ ධාවනය වෙමින් තිබී ඇති අතර, එම වාහන ඒවායේ ගමන් කළ පිරිස්ද සමගින් ගංගාවේ ගිලී ගොස් තිබේ. මෙම අනතුර රාත්‍රී කාලයෙ දී සිදු වී ඇති බැවින් ජීවිත බේරාගැනීමට බොහෝ දුෂ්කර වී ඇත. 

එය සිංගප්පූරුවෙහි Grace Ocean Private Ltd නම් නෞකා සමාගමට අයත් සුප්‍රසිද්ධ Maersk සමාගම යටතේ ක්‍රියාත්මක වූ Dali ලෙස නම් කෙරුණු මෙම නෞකාව සිංගප්පූරු ධජය යටතේ යාත්‍රා කරමින් තිබී ඇත. 

Maersk සමාගම සඳහන් කරන ආකාරයට මෙම නෞකාව ඊයේ (26දා) බැල්ටිමෝල් වරායෙන් පිටත්ව ලබන අප්‍රේල් 22 වැනිදා වන විට ශ්‍රී ලංකාවේ කොළඹ වරාය වෙත පැමිණීමට නියමිතව තිබූ නෞකාවකි.
මෙහිදී විශේෂිත නෞකා මෙහෙයුම් සිදු කරන සමාගමක් වන සිනර්ජි මැරීන් ගෲප් සමාගම එහි මෙහෙයුම් සිදු කර තිබේ. 

සිනර්පී මැරින් ගෲප් සමාගම සිය වෙබ් අඩවියේ සඳහන් කළ ආකාරයට මෙම නෞකාව බහාලුම් 10,000 ක ධාරිතාවක් රැගෙන යා හැකි නෞකාවකි. මෙම අනතුර සිදුවන අවස්ථාව වන විට එහි බහාලුම් 4,679 ක් තිබී ඇත.

මෙම Dali නෞකාව එක්සත් ජන පද නැගෙනහිර වේලාවෙන් ඊයේ මධ්‍යම රාත්‍රී
12.44 ට පමණ බැල්ටිමෝර් වරායෙන් පිටත්ව පැටපස්කෝ ගංගාව කරා ළගා වෙමින් තිබියදී මෙලෙස පාලමෙහි ගැටී තිබේ. එම අවස්ථාවේදී වේලාව අලුයම 1.25 ලෙස සටහන්ව ඇත.
නෞකාව පාලමෙහි ගැටෙන ආකාරය සහ ඉන් අනතුරුව පාලමේ ලෝහ රාමුව ඇතුළු කොටස් කැඩී ගංගාව වෙත ඇද වැටෙන ආකාරය අසල පිහිටි ආරක්ෂිත කැමරාවල සටහන්ව තිබේ. මෙම ගැටීමත් සමගින්ම නෞකාවේද ආලෝක පද්ධතිය වෙත යම් බලපෑමක් එල්ල වන ආකාරයද එම දර්ශනවලදී දැක ගත හැකිය.

මෙම ගැටීම සිදුවන අවස්ථාවේදී නෞකාව තුළ කාර්ය මණ්ඩල සාමාජිකයන් 22 දෙනෙකු සිටි බව අනාවරණය වී තිබේ. ඔවුන් සියලු දෙනාම ඉන්දියානු ජාතිකයන් වන අතර, අනතුරින් ඔවුන්ට කිසිදු හානියක් සිදුව නැතැයි සිනර්ජි මැරීන් ගෘප් සමාගම පවසා තිබේ.

මේ අතර අනතුර සිදු වන අවස්ථාවේදී ඉදිකිරීම් සේවකයන් පිරිසක්ද එම පාලමෙහි නඩත්තු කටයුත්තක යෙදී සිට ඇති අතර, 20 දෙනෙකුට අධික පිරිසක් පැටැප්ස් ස්කෝ ගංගාව තුළට වැටී ඇතැයි පොලීසිය ඇස්තමේන්තු කර තිබේ. ඒ අනුව මෙම පාලම් කඩා වැටීමේ අවස්ථාව දරුණු විනාශයක් බවට පත්වීමේ හැකියාවක් පවතින බවත් බැල්ටිමෝර් බලධාරීන් වැඩිදුරටත් පවසා සිටී.

1977 වසරේදී විවෘත කෙරුණු මෙම බැල්ටිමෝර් පාලම කිලෝමීටර් 2.6ක දිගකින් යුක්ත වන එක්සත් ජනපදයේ පාලම් අතරින් ප්‍රධානතම පාලමකි. මංතීරු හතරකින් සමන්විත මෙම පාලම මගින් වාර්ෂිකව මෝටර් රථ මිලියන 11 ක් එහා මෙහා ගමන් කරන බව සඳහන් වෙයි.