අද (03) බදාදා උදෑසන එරට කාර්ය බහුල වේලාවේ දී නැගෙනහිර තායිවානයේ ඇති වූ රික්ටර් මාපක 7.4 භූමිකම්පාවෙන් පුද්ගලයින් සිව් දෙනෙකු මිය ගොස් 900කට වැඩි පිරිසක් තුවාල ලබා ඇත. 

තායිවානයේ වසර 25කට පසුව ඇති වූ ප්‍රභලහ භූ කම්පනය මෙය බව වාර්තා වන අතර ගොඩනැගිලි කඩාවැටීම්, ගොඩනැගිලි ඇලවීම්, මහාමාර්ග ගිලාබැසීම් ආදී විනාශයන් රැසක් සිදු වී ඇති බව විදෙස් මාධ්‍ය වාර්තා පෙන්වා දෙයි. 

භූමිකම්පාවෙන් අනතුරුව ජපානයේ වෙරළබඩ ප්‍රදේශ වලට යම් සුනාමි තත්ත්වයක් ඇතිවෙතැයි අනතුරු ඇගවූ නමුත් ටික වේලාවකින් එය ඉවත් කර ඇත. 
නැගෙනහිර තායිවානයේ Hualien ප්‍රාන්තය - භූමිකම්පාවේ කේන්ද්‍රස්ථානය විය. 

එහි අපිකේන්ද්‍රය Hualien සිට සැතපුම් 11ක් නිරිත දෙසින් සහ සැතපුම් 22ක් පමණ ගැඹුරින් ඇති බවට ප්‍රකාශ කොට ඇත. 

තායිවානයේ නිවාස 87,000 කට වැඩි ගණනකට විදුලිය විසන්ධි විය.

මිලියන 23 ක ජනතාවක් වාසය කරන - තායිවානය හරහා දුම්රිය සේවා මෙන්ම මෙට්‍රෝ ප්‍රවාහන පහසුකම් ද අත්හිටුවා ඇත.

තායිවානය පිහිටා ඇත්තේ පැසිෆික් ගිනි වළල්ල දිගේ වන අතර එය ලෝකයේ බොහෝ භූමිකම්පා සිදුවන භූ කම්පන දෝෂ සහිත රේඛාවකි.
මෑත වසරවලදී තායිවානයේ ඇති වූ දරුණුතම භූමිකම්පාව 1999 දී ඇති වූ අතර එය රික්ටර් පරිමාණයේ 7.7 ක ප්‍රබලතාවකින් යුක්ත වූ අතර 2,400 ක් මිය ගිය අතර 100,000 ක් පමණ තුවාල ලැබූ අතර ගොඩනැගිලි දහස් ගණනක් විනාශ විය.