වේල්සයේ කුමරිය කේට් මිඩ්ල්ටන් කෝ ?
Mar 18, 2024 at 11:05 AM
|
ඇයගේ රුව යොදා සකසන ලදැයි මාධ්‍ය මගින් හෙළිකරනු ලැබුවේ මෙම ඡායාරූපයයි.
වේල්සයේ කුමරිය වන කේට් මිඩ්ල්ටන්ට කුමක් සිදු වීද යන්න ප්‍රශ්න සහගත බවත්, බ්‍රිතාන්‍ය රජ පවුල තුළ සිදුවන දේ අභිරහසක් බවට පත්ව ඇති බවත් විදෙස් බොහෝ විදෙස් මාධ්‍ය වාර්තා කරනවා.
ඒ පසුගිය දෙසැම්බර් මාසයෙන් පසුව ඇය ප්‍රසිද්ධියේ දැකගැන්නට නොලැබීමත් සමගයි. ජනවාරි මාසයේදී ඇයගේ උදරයේ සැත්කමක් සිදු කරන බවට රාජකීය පවුල දැනුම් දුන්නද අද වනතුරුත් කේට් කුමරිය පිළිබඳ නිසි තොරතුරක් හෙළිකර නොමැති බව සදහන් වෙනවා.
ඉහත ඡායාරූපය මව්වරුන්ගේ දිනය වෙනුවෙන් නිකුත් කළ එකක් වුවද එය සංස්කරණය කළ ඡායාරූපයක් බව මාධ්‍යවේදීන් අනාවරණය කර තිබුණා. කේට් කුමරියගේ අතේ මගුල් මුද්ද නොමැති වීම එම සංස්කරණය සනාථ වීමට එක් හේතුවක් ලෙස දක්වන අතර කෙසේ වෙතත් එය සංස්කරණය කළ ඡායාරූපයක් බව කේට් කුමරිය විසින්ම සිය ඉන්ස්ටග්‍රෑම් ගිණුමේ පිළිගැනීමත් සමග මේ පිළිබඳ මාධ්‍යවේදීන්ගේ කුතුහලය වැඩි වී තිබෙනවා.
ඇය ජීවත් වනවාද නැද්ද යන්න ප්‍රශ්න සහගත බවට ද ඇතැම් මාධ්‍ය වාර්තා පළ වී තිබෙනවා.
මේ අතර බ්‍රිතාන්‍යයේ චාල්ස් රජු ද පිළිකා තත්වයකින් පෙළෙන බවට පසුගිය කාලයේ වාර්තා කරනු ලැබුවා.
මේ අතරතුර ඉදිරි දින කිහිපය තුළ බකිංහැම් මාළිගයෙන් ඉතා වැදගත් නිවේදනයක් ලැබෙනු ඇති බවට එරට මාධ්‍ය වැඩිදුරටත් වාර්තා කරනවා.
