ඉතිහාසය අලුත් කරමින් ශ්‍රී ලංකා ක්‍රීඩිකාවෝ ආසියානු කුසලානය දිනාගනී

Jul 29, 2024 at 12:27 AM

|

Dawasa News

ශ්‍රී ලාංකීය කාන්තා ක්‍රිකට් ඉතිහාසයේ ආසියානු කුසලානය ප්‍රථම වතාවට දිනාගැනීමට අද (28) ශ්‍රී ලංකා කාන්තා ක්‍රිකට් කණ්ඩායම සමත් වුණා.

දඹුල්ල ජාත්‍යන්තර ක්‍රිකට් ක්‍රීඩාංගනයේ දී අද පැවති තරගයෙන් ඉන්දියාවට එරෙහිව පන්දු 08 ක් ඉතිරිව තිබියදී කඩුළු 08කින් අවසාන මහා තරගය ජයගන්නට ශ්‍රී ලංකා කාන්තා ක්‍රීඩිකාවන්ට හැකිවුණා.

මෙහිදී ඉන්දියාව පළමුව පන්දුවට පහරදුන් අතර ඔවුන් පන්දුවාර 20ක් අවසානයේ කඩුළු 06ක් දැවී ලකුණු 165ක් ලබාගත් අතර ශ්‍රී ලංකා කණ්ඩායම ඊට පිළිතුරු ලෙස කඩුළු 08ක් අතැතිව ලකුණු 167ක් ලබාගනිමින් ජයග්‍රහණය කරනු ලැබුවා.

මෙහිදී චමරි අතපත්තු පන්දු 43කදී ලකුණු 61 ක් සහ හර්ෂිතා සමරවික්‍රම පන්දු 51කදී ලකුණු 69ක් ලබාගත් අතර කවීෂා දිල්හාරි කඩුළු 02ක් ලබාගත්තා.

කුසලානයට අමතරව තරගාවලියේ වීරයා ශූරතාව නායිකා චමරි අතපත්තුට හිමි වෙද්දී අවසන් මහා තරගයේ වීරයා ලෙස හර්ෂිතා සමරවික්‍රම ශුරතාව  දිනාගනු ලැබුවා.   

තරගය අවසන් වීමෙන් පසුව ජනාධිපති රනිල් වික්‍රමසිංහ මහතා ද නායිකා චමරි අතපත්තු දුරකථනයෙන් අමතා සුබපැතුම් එක්කළ බව වාර්තා වෙනවා.

එසේම තරගාවලිය ජයග්‍රහණයෙන් ලැබෙන මුදලට අමතරව විශේෂ ත්‍යාගයක් ලෙස ඩොලර් ලක්ෂයක මුදලක් කණ්ඩායම වෙත ලබාදෙන බව ශ්‍රී ලංකා ක්‍රිකට් ආයතනය නිවේදනය කර ඇති බව ද වාර්තා වෙනවා.

ඉතිහාසය අලුත් කළ ශ්‍රී ලංකා ක්‍රීඩිකාවන්ට අපගේ හෘදයාංගම සුබපැතුම් එක්කරමු.